Kruanh dak Võ Văn Thưởng lĕ tât mpoh su nhang kahgĭt đồng chí Trường Chinh- nuĭh leo kan 3 tơ̆ mât leo ƀư Tổng Bí thư bâh Đảng n’hanh lah kruanh Hội đồng ngih dak bâh năm 1981-1987. Neh dak dơi geh nău dơi kơt aƀaơ, lĕ lah na nê̆ nău di bâh trong kan rgâl mhe ma đồng chí Trường Chinh lah nuĭh săch đă kan n’hanh ntơm leo kan.

Kruanh dak Võ Văn Thưởng lĕ tât mpoh su nhang kahgĭt Đại tướng Trần Đại Quang, kruanh dak bâh năm 2016 tât 2018. Lah nuĭh dâk bôk năp Ngih dak, kruanh dak Trần Đại Quang lĕ an tay nău kahgĭt khlăy tâm nuih n’hâm băl mpôl lam ntur neh, ntop n’hao nău dơi kan, nău knơm bâh neh dak. Di rơh năm mhe, kruanh dak Võ Văn Thưởng lĕ tât khâl kruanh dak ơm Trần Đức Lương n’hanh kruanh dak ơm Nguyễn Xuân Phúc. Kruanh dak Võ Văn Thưởng rhơn ăp đồng chí tă leo kan ndrel đah rnăk vâl ngăch dăng, đăp mpăn, an geh ntop săk soan, nău mĭn n’hanh nău tă blău kan gay ma tâm rgop âk lơn tay an nău hun hao bâh neh dak.