VOV4.M’nông – Măng nđaơ (24/2) tĭng mông ta ntŭk, ndeh păr ndơ̆ Kruanh dak Nguyễn Xuân Phúc n’hanh I ur ndrel Mpôl gưl prêh Việt Nam lĕ tât tach ndeh păr quốc tế Changi, ntơm rơh hăn khâl gưl ngih dak Singapore. Wơt Kruanh dak, I ur n’hanh Mpôl gưl prêh ta tach ndeh păr, mpeh đah Singapore geh Kruanh n’gâng kan tâm rnglăp nchră nău Vivivan Balakrishnan, Đại sứ Singapore ta Việt Nam Jaya Ratnam. Mpeh đah Việt Nam geh Đại sứ Việt Nam ta Singapore wa Mai Phước Dũng, cán bộ n’hanh nuĭh kan Đại sứ Việt Nam ta Singapore.

Kruanh dak Nguyễn Xuân Phúc khâl na nê̆ gưl ngih dak Singapore

Tĭng bôk nău kan, tâm rnôk khâl, Kruanh dak Nguyễn Xuân Phúc mbra geh rơh rgum nchră đah Tổng thống Halimah Yacob, rgum nchră đah Thủ tướng Lý Hiển Long, rgum nchră đah Kruanh Quốc hội Tan Chuan-Jin. Ăp rơh mâp gưl prêh aơ gay ntrŭt kan ndrel 2 dak lĕ ký, tâm nchră ăp bôk nău kan ndrel mhe, ƀư jru lơn tâm boh kan ndrel têh hvi Việt Nam-Singapore. Ăp n’gâng kan, nău kan, doanh nghiệp 2 dak mbra tâm rgâl ăp sam ƀŭt khlay kan ndrel tâm ăp nău kan wăng sa, tăch rgâl, mât njrăng bri dak, thông tin n’hanh truyền thông, khoa học công nghệ...

Nuĭh rblang: Y Sưng Phê Ja