Nthoi tay nău kan ntrŭt ntrôl tâm nđŭr ƀon lan bar dak, tâm bôk nău kan khâl gưl Ngih dak Đại Hàn Dân Quốc, kêng măng 6/12, Kruanh dak Nguyễn Xuân Phúc n'hanh Mpôl gưl têh Việt Nam hŏ tât khâl n'gor Gyeonggi mpeh nhâp nar bah Hàn Quốc, ngai đah Thủ đô Seoul nklăp 1 mông hăn ndeh.

Wơt n'hanh pah kan đah Kruanh dak n'hanh mpôl ntơh măt geh kruanh n'gor Gyeonggi Kim Dong-yeon n'hanh ăp kruanh tâm boh gưl têh dak bah dih, n'gor Gyeonggi n'hanh nkual ƀon têh Gwangju. Gyeonggi lah n'gor dâk bôk năp Hàn Quốc mpeh rnoh âk nuĭh, dâk tâl 5 mpeh rnoh hvi. N'gor geh 28 nkual ƀon têh n'hanh 3 nkuâl, nkual ƀon têh tơm lah Suwon. Lơn lah, aơ lah ƀon tơm tâl bar bah nklăp bơi 37 rbăn nuĭh Việt; tâm nê geh nklăp 3.000 nuĭh Việt đah rlău 500 rnăk âk săk ntơr văn hóa Việt - Hàn dôl gŭ rêh ta nkual ƀon têh Gwangju. Ta rơh pah kan, Kruanh dak Nguyễn Xuân Phúc dăn đă kruanh n'gor Gyeonggi, nkual ƀon têh Gwangju n'hanh n'gâng kan n'gor n'hao dăng ntrŭt nsôr ăp doanh nghiệp bah n'gor pơk hvi n'hanh âk ntil trong ntuh kơl, tăch rgâl ta ăp n'gor bah Việt Nam, ntop kơl tâm pă nău tă ơm gĭt kan an ăp n'gor Việt Nam tâm pah kan mât bôk kan, dăp rgum hun hao pâl nđaih, mĭn uănh dơn geh âk lơn nuĭh kan bah Việt Nam; uănh khlay tay, an ƀư lor mpeh trong kơl đah nuĭh Việt ta n'gor.

 Măng ndrel nar, Kruanh dak Nguyễn Xuân Phúc n'hanh mpôl ntơh măt gưl têh Việt Nam hŏ sĭt bah n'gor Gyeonggi, hăn tât tach ndeh păr Thủ đô Seoul, sĭt dak nơm, dŭt jêh lĕ rngôch bôk nău kan hăn khâl gưl Ngih dak Đại Hàn Dân Quốc.

VOV/Nuĭh rblang: Điểu Thân