VOV4.M’nông: Di nkah gĭt 77 năm nar Cách mạng khay 8 ndrel Quốc khánh 2/9, 53 năm nar roh Wa Hồ, lŏ tâm bôk nau hăn kan ta Tuyên Quang, ôi 4/9, Kruanh dak Nguyễn Xuân Phúc leo bôk rmôt hăn kan lĕ tât mpoh kthup, leo nkah nkah tât Kruanh Hồ Chí Minh tâm Lán Nà Nưa, tâm ntŭk ƀư nau kan nkah ơm bah neh dak ueh khlay Tân Trào. Bah năp huêng bah Kruanh Hồ Chí Minh, Kruanh dak Nguyễn Xuân Phúc ndrel rmôt hŏ dŏng du mnĭt gay ma nkah tât Wa.

Kruanh dak ntoh nau lah ueh ngăn mpeh nau kan têh ang bah Wa, nŭih rđau kan blau, Nŭih nai ntĭm nti blau ngăn bah cách mạng Việt Nam, lôch nuih n’hâm kơl an nau đăp mpăn rnoi mpôl, đăp mpăn neh dak, ân nau dah rŏng, ueh lăng bah ƀon lan. Jêh nê, Kruanh dak Nguyễn Xuân Phúc ndrel rmôt hăn kan ta Đình Tân Trào, tâm mpeh ba dâng bah Thôn Tân Lập, xã Tân Trào, lah ntŭk geh nau ƀư Quốc dân Đại hội, nau ntơm geh bah Quốc hội Việt Nam, tâm lơ 16 khay 8 năm 1945.

Quốc dân Đại hội Tân Trào lah du nau kan têh nkah tât nau ueh dơi bah nau vay ơm cách mạng Việt Nam, rgŏ jă nau kan ntơm nsĭt lơi n’gâng kan nơm du trong ngăch ngăn, ndal ngăn, gay ma ƀon lan lam dak ntơm ndâk ndel ma ƀư tơm nau rêh bah nơm ndrel neh dak nơm.

Tâm Ngih văn hoá Thôn Tân Lập, xã Tân Trào, Kruanh dak Nguyễn Xuân Phúc kŏ ôp khâl, bonh đă ăp nŭih bah rmôt ƀư nau mprơ Then thôn Tân Lập xã Tân Trào nkuăl Sơn Dương. Kruanh dak ŭch ăp nŭih bah rmôt geh nau blau lơn tâm nau kan mât, ƀư tĭng ueh ăp nau khlay ueh ơm bah nau mprơ Then, ndơ ơm ueh khlay hŏ geh UNESCO kơp dơn nchih moh./.

Nŭih rblang: H’Thi