VOV4.M’nông – Jêh rnôk Rmôt U23 Việt Nam dăng 1-0 đah rmôt U23 Thái Lan, mât njrăng lôch dơi Vô địch môn chưng play Bu klô ta Đại hội thể thao Đông Nam Á (SEA Games 31), Kruanh dak Nguyễn Xuân Phúc, Thủ tướng Phạm Minh Chính, Kruanh Quốc hội Vương Đình Huệ n’hanh Ủy viên Bộ Chính trị, Rnâng kan Ban Bí thư Võ Văn Thưởng lĕ jŭr tach chưng play mbah rhơn n’hanh an Huy chương Đồng môn chưng play bu klô an ăp nuĭh Mpôl tiăr nti n’hanh ăp Nuĭh Rmôt U23 Indonéứia; an Huy chương Bạc an ăp nuĭh Mpôl tiăr nti n’hanh ăp nuĭh chưng Rmôt U23 Thái Lan; n’hanh an Huy chương Vàng an nuĭh tiăr Park-Hang-seo, ăp nuĭh Mpôl tiăr n’hanh ăp (chiến binh sao Vàng), ăp nuĭh lĕ tâm rlong dŭt n’hâm gay nsĭt tay ntơr ang an Neh dak n’hanh nău răm têh an nuĭh ƀon lan ŭch lam dak. Ndơn măt kruanh Đảng, Ngih dak n’hanh nuĭh ŭch chưng play lam dak, Kruanh dak Nguyễn Xuân Phúc lĕ rnê rhơn n’hanh lah uĕh nuĭh tiăr nti Park Hang-seo n’hanh ăp nuĭh chưng U23 Việt Nam lĕ ƀư jêng lịch sử ta SEA Games 31.

Kruanh dak n’hanh Thủ tướng chính phủ mbah rhơn Mpôl tiăr nti n’hanh Rmôt chưng play bu klô U23 ngih dak Việt Nam

Thủ tướng Chính phủ Phạm Minh Chính lĕ geh sam ƀŭt mbah rhơn Mpôl tiăr nti n’hanh Rmôt chưng play bu klô U23 ngih dak Việt Nam jêh rnôk Rmôt mât njrăng lôch dơi Huy chương Vàng ta SEA Games 31. Nău dơi têh nar aơ, ndrel đah Huy chương Vàng bah Rmôt chưng play bu ur n’hanh nău dơi ăp môn thể thao tâm rlong ta SEA Games 31 dơi geh lĕ mĭn jâng nsan bah chưng play Việt Nam lah êng, thể thao Việt Nam lah nsum ta nkual n’hanh ntơm hao lam ntŭr neh.

Nuĭh rblang: Y Sưng Phê Ja