VOV4.M'nông: Nkhêp geh Tết Trung thu, Kruanh dak Nguyễn Xuân Phúc njuăl si ƀŭt tât ăp oh mon kon său, kon se jê̆. Tâm si ƀŭt njuăl, Kruanh dak mbah rhơn tết tât lĕ rngôch kon se jê̆ Việt Nam rhơn Trung thu răm mƀak ndrel đah ăp rnăk wâl dêh rŏng bah he, tâm pă nău tâm rŏng tât đah kon se mô geh nău lap tâm nău rêh mô dơi geh pâl du Tết Trung thu ăp tŏng.

Kruanh dak mpơl nău ŭch rŏng, oh mon, kon sĕ jê̆ lam dak way geh nuih n'hâm nsrôih rlău nău jêr jŏt, nsan hao tâm kơt nti n'hanh tâm nău rêh. Nkre dăn đă ăp rnăk, ăp gưl, ăp n'gâng kan n'hanh nsum mpôl, ma nuih n'hâm dơn kan, nău tâm rŏng ân geh tay âk nău kan ngăn ngăn lơn đŏng, mât chăm an ăp oh mon, kon său tâm nar Tết Trung thu, lơn lah đah ăp kon se kon đơi, ăp oh mon mâp nău rêh jêr jŏt, kon său ta nkual jru, nkual ngai, nkual n'har bri, gôl dak, gay lĕ rngôch ăp kon se dơi mât uănh hun hao lam lĕ rngôch, dơi rêh tâm nău mât nkrum, nău rêh đăp mpăn, kloh uĕh./.

Nuĭh rblang: Điểu Thân