Ôi 29/3, Thành ủy Hà Nội hŏ ƀư n'glôch jêh 10 năm tĭng ƀư Nghị quyết Trung ương 8 khóa XI mpeh trong mât njrăng neh dak tâm nô nău mhe. Kruanh dak Võ Văn Thưởng hŏ tât râng n'hanh rđău đă tâm nchră.

Lah rjăp Hà Nội lah play nuih bah lam dak, lah ntŭk rgum bôk rngok chính trị neh dak, Kruanh dak Võ Văn Thưởng dăn đă Hà Nội mbơh gĭt jru hvi nău mĭn: Hun hao wăng sa lah nău dơn kan khlay, rdâk njêng Đảng lah n'gâng tơm hun hao văn hóa lah jâng nsing nuih n'hâm n'hanh đăp mpăn njrăng n'gang neh dak, rnă njrăng lah tơm khlay, way mbro. Kruanh dak Võ Văn Thưởng dăn đă Hà Nội mât chăm rdâk njêng mpôl tahen nkual ƀon têh nâp dăng, lam lĕ rngôch đah dăp rgum rnoh âk tâm di, geh han săk chính trị nâp dăng, du nuih n'hâm đah Đảng, đah neh dak n'hanh ƀon lan; ngăch prăl mpeh trong lơh, nău kan, tŏng đah nău ŭch geh nchrăp rdâng lơh âk, mât njrăng nâp, mô an Thủ đô geh ndrât ndal tâm ăp nău tât.