VOV4.M’nông – Nthoi tay bôk nău kan ta An Giang, ôi 18/1, ta nkual ƀon têh Long Xuyên, Kruanh dak Nguyễn Xuân Phúc râng ntơm ƀư Nău nchrăp kan ntuh kơl ndâk ƀư trong nthoi Quốc lộ 91 n’hanh trong dêr Nkual ƀon têh Long Xuyên. Aơ lah ntung trong bôk năp bah N’gâng kan ntung trong dơi rdâk ƀư tâm năm 2022. Nău nchrăp ƀư ntuh kơl ndâk ƀư trong nthoi Quốc lộ 91 n’hanh trong dêr nkual ƀon têh Long Xuyên dơi Thủ tướng Chính phủ Nguyễn Xuân Phúc uănh an ntrŭnh ntuh kơl bah năm 2017, geh tâm dĭng lĕ ntrong ƀư nsum bah Nău nchrăp ƀư nthoi dâng rđŭng Mekong. Nău nchrăp ƀư geh dĭng lĕ 2.100 rmen prăk, dơi ntuh kơl đah tơm prăk manh bah Ngân hàng hun hao Châu Á (ADB) n’hanh du gâl manh bah chính phủ Việt Nam, yor n’gâng kan ntung trong ƀư tơm. Aơ lah ndơ ƀư tâm di nău ŭch bah 20 năm bah năp bâh nuĭh ƀon lan An Giang. Kruanh dak Nguyễn Xuân Phúc răm rhơn râng ntơm ƀư n’hanh mpŏng ŭch, aơ lah nău nchrăp ƀư pơk bôk năm 2022 gay bah nĕ pơk hvi ăp nău ƀư ntuh kơl âk lơn đah trong ndeh, trong dak lêng, trong dak me ta An Giang n’hanh nkual dâng rđŭng dak me Cửu Long, nkual 20 rkeh nuĭh đah nău sâm geh hun hao.

Nŭih rblang: H’Thi