Kêng măng 2/2, ta nkuăl ƀon têh Thủ Đức, nkuăl ƀon têh Hồ Chí Minh geh bôk nau kan Tết rgum nsum-năm mhe nkah kơl, yor MTTQ Việt Nam, Liên đoàn Lao động Việt Nam nkuăl ƀon têh Thủ Đức tâm rgop ƀư. Kruanh dak Võ Văn Thưởng râng, ntoh nau tâm nar kan. Bôk nau kan Tết rgum nsum-năm mhe nkah kơl ƀư tâm rnôk tết năm mhe ăp năm, yor Công đoàn ăp gưl ƀư, gay pơk trong nơih ueh, rjăp, duh răm tât đoàn viên công đoàn ndrel nŭih pah kan di rnôk năm mhe, ngăn lah ăp nŭih geh nau rêh jêr jŏt, mô dơi sĭt sa Tết. Ntoh nau tâm bôk nau kan, Kruanh dak Võ Văn Thưởng lah rjăp, nkuăl ƀon têh Hồ Chí Minh lah ntŭk ndâk âk nau kan kơl an tâm nau rêh geh nau dơi ndrel săk tam.

Rgop nau ngăn tâm nau mât chăm kơl an nŭih ach o, nŭih geh nau rêh jêr jŏt, rnăk dơi kơl, mô knŭng tâm nkuăl ƀon têh ma tâm nkuăl ndrel lam dak. Yơn lah, Kruanh dak ân lah, năm 2023 geh âk ntŭk kan mâp nau jêr, rnoh geh nkhôm tết mô âk, khuch ngăn tât nau mât chăm Tết ân công nhân, nŭih pah kan. Tâm rnôk nê, đah nau rgŏ jă bah MTTQ Việt Nam, Tổng Liên đoàn Lao động Việt Nam ndrel ăp ntŭk kan êng, bôk nau kan Tết rgum nsum-năm mhe nkah kơl hŏ rgop nau khlay tâm nau mât chăm tết ân công nhân, nŭih pah kan geh nau rêh jêr jŏt gay ăp nŭih kŏ geh vơt Tết./.