Ôi 21/8, ta Nhih pah kan kruanh dak, Kruanh dak Võ Văn Thưởng ƀư tơm lễ wơt rgum Tổng thống Kazakhstan Kassym - Jomart Tokayev khâl ngăn Việt Nam nar 20-22/8. Lôch lễ wơt, bar kruanh rđău kan ƀư tâm nchră. Aơ lah hăn khâl Việt Nam lor bôk năp bah wa Tokayev ntơm bah rnôk hao mât bôk kan năm 2019, lah trong hăn khâl Việt Nam lor bôk năp bah Tổng thống Kazakhstan tâm 12 năm aơ.

Việt Nam n’hanh Kazakhstan njêng tâm boh nar 29/6/1992. Năm e nơh, bar dak nkah ndray 30 năm njêng tâm boh. Ntơm bah rnôk tâm ton dah rŏng tăch rgâl Việt Nam - Liên minh kinh tế Á - Âu (EAEU), lah ăp dak Armenia, Belarus, Kazakhstan, Nga n’hanh Kyrgyzstan geh nău tam năm 2016, nsĭt geh tăch rgâl bar ding Việt Nam - Kazakhstan rĭng hao nklăp 28% /năm. Nsĭt geh tăch rgâl bar ding năm 2022 geh bơi 600 rkeh USD. Bar ding ndơ̆ luh nsĭt geh tăch rgâl hao 1,5 rmen USD tâm năm 2030.