Nkhêp geh nkah ndray 69 năm Nar nai dak si Việt Nam, Kruanh dak Võ Văn Thưởng khâl,mbah rhơn ăp nao dak si ta n’gor Hà Nam. 

Ta Trung tâm Y tế nkuâl Thanh Liêm, Kruanh dak hŏ khâl ntŭk wơt êng nuĭh ji dŏng thẻ căn cước công dân rgâl an thẻ BHYT, du trong leo nsĭt tay âk nău dơh uĕh an nuĭh ji, lơn lah mpêt nkrem mông nar kan an lĕ ma bác sĩ n’hanh nuĭh ji. Nkhêp  nkah ndray  Nar nai dak si Việt Nam, ntơh măt kruanh rđău kan Đảng, Ngih dak, Kruanh dak Võ Văn Thưởng njuăl nău mbah rhơn dŭt uĕh lăng, nău uănh khlay, nău rŏng tât ăp nai dak si, cán bộ nuĭh kan dak si, nkuâl Thanh Liêm n’hanh n’gor Hà Nam.

Kruanh dak rnê âk bah nhih dak si xã let lơ bah nkuâl hŏ tĭng ƀư  jăp bôk nău kan gưl neh dak mpeh dak si tâm dâng, chuh n’gang vaccine, mât chăm n’hâm suan bôk năp, mbơh nti mât n’hâm suan druh  ndăm, but săm ji  n’hanh  mât chăm ăp nuĭh ji jŏ bah. Kruanh dak an lah, lah nău kan dak si tâm  dâng kan ŭeh geh nău tam mbra rgop rdâk njêng nău kan let năp tay nâp dăng an n’gâng kan ta ntŭk  n’hanh neh dak.

Kruanh dak dăn đă ăp gưl ủy, n’gâng kan n’hanh nhih  pah kan geh tât bah n’gor Hà Nam, nkuâl Thanh Liêm uănh khlay tay gay ntuh kơl lơn đŏng an dak si  tâm dâng tĭng trong rgum ntuh kơl hun hao tơm nuĭh kan, bah nê n’hao săk  tam but săm ji tâm dâng; ntuh kơl tay drăp ndơ, rvăt năp ndơ  dŏng kan dak si, rdâk njêng nhih dak si ăp tŏng geh, dêh bên, kloh uĕh./.