Kêng măng 19/7, ta UBND nkuâl Côn Đảo, Kruanh dak Võ Văn Thưởng mâp măt nuĭh ntơh măt rnâng kan Ban tâm ôp joi tahen cách mạng Việt Nam geh phŭng rlăng nhŭp, nkông, krŭng n’hanh 76 nuĭh tă gŭ ndrung chính trị Côn Đảo ntơh măt an rlău 5.000 cán bộ, tahen cách mạng geh phŭng rlăng nhŭp, nkông krŭng, ôp khâl, rgŏ jă n’hanh nchih nkah n’hâm suan, nău roh yot têh kuâng bah rơh kơn tahen cách mạng, ăp tahen dăng janh khĭt tâm lơh tâm su n’hanh nuĭh rŏng dak, yor ma n’gâng kan rklaih luh rnoi nuĭh. Ta rơh mâp măt, ăp đại biểu hŏ nkah tay du rơh krit jêr ma dăng janh bah ăp tahen cách mạng rôih sŏng, bol geh phŭng rlăng nkrit lơh, ân rgâl ma nting mham, nău rêh, yơn way mât nâp nuih n’hâm cách mạng.

Lôch âk năm plơ̆ tay Côn Đảo, âk nuĭh tă gŭ ndrung chính trị mpơl nău rhơn dơi ŭanh saơ nău “rgâl ntô, mblăy” bah ntŭk tă dơi uănh lah “Ndrung krŭng khĭt rêh”, ntŭk ma tĭng ntang lŭ, n’ging si, chông pih kăl e hĭng gŭr nting mham bah ăp tahen cách mạng rôih sŏng. Lah ta rơh mâp măt, Kruanh dak Võ Văn Thưởng njuăl nău ôp khâl dŭt n’hâm, ăp nău rŏng jru hvi n’hanh nuih n’hâm nkah gĭt dŭt jru tât ăp nuĭh tă gŭ ndrung chính trị Côn Đảo; an gĭt ăp năm rlău aơ, Đảng, Ngih dak way ŭanh khlay mât chăm nău rêh đah rlău 9 rkeh nuĭh geh n’hâm suan; ntrôl dăng tay nău kan nkah gĭt n’hâm suan, lơn lah nău rgum joi nting tahen ơm khĭt, nkra têh uĕh tay ăp nghĩa trang, ƀư uĕh tay ăp môch blang, mpơl nău ngêt dak nkah gĭt, tu tơm.

Kêng măng ndrel nar, Kruanh dak hŏ tât hăn chop uănh Bảo tàng Côn Đảo n’hanh ntŭk têl ơm yău ta ndrung krŭng Phú Hải.