Kêng măng nar 27/7, Kruanh dak Võ Văn Thưởng n’hanh I ur ndrel mpôl ntơh măt gưl têh Việt Nam hŏ mâp Thủ tướng Tòa thánh, Hồng y Pietro Parolin ta Toà thánh Vatican. Ta rơh mâp, Kruanh dak Võ Văn Thưởng lah rjăp, Đảng n’hanh Ngih dak Việt Nam way nta trong dơh an ăp chroh rƀŭn, hun hao tĭng quy định bah Hiến pháp n’hanh pháp luật; tâm nê geh Luật tín ngưỡng tôn giáo n’hanh ƀư lôch jêh ăp tŏng tay tâm trôm pháp luật an nău kan chroh rƀŭn bah nuĭh ƀon lan n’hanh ăp mpôl chroh rƀŭn.

Kruanh dak Võ Văn Thưởng mpơl nău ŭch rŏng Thủ tướng, Hồng y Parolin uănh khlay tay tât nău kan bah ƀon lan chroh Bap ta Việt Nam. Thủ tướng, Hồng y Parolin rnê âk ăp nău dơi bah Việt Nam tâm mât đăp mpăn tă bah chroh rƀŭn an lĕ rngôch ăp ntil chroh, tâm nê geh chroh Bap. Thủ tướng Vatican lah uĕh nău dơn dơn bah Việt Nam mpeh ăp nău rgop bah giáo hội Công giáo Việt Nam, lơn lah tâm ăp trong kan kơl êng nuĭh, ntĭm nti, dak si, ntĭm nău kan. Thủ tướng Vatican rhơn rnê nău khlay bah Rmôt pah kan rgum Việt Nam - Vatican tâm n’hao dăng nău tâm gĭt wât n’hanh nău nsing nơm nsum./.