Kêng măng nđaơ (10/11), tâm bôk nău kan pah kan ta Phú Yên, Kruanh dak Võ Văn Thưởng pah kan đah kruanh n’gâng tơm n’gor Phú Yên mpeh nu nău ƀư tĭng nghị quyết bah Đảng n’hanh n’gul năm kan ƀư tĭng Nghị quyết Đại hội Đảng bộ n’gor rơh tal 17 (2020-2025).

Ntoh ngơi ta nar pah kan, Kruanh dak Võ Văn Thưởng uănh lah prêh Đảng bộ, n’gâng kan n’hanh ƀon lan n’gor Phú Yên lĕ geh âk nău nsrôih gay dơi geh ăp săk rnglăy dŭt n’hâm tâm âk ntil nău, ndơ̆ Phú Yên jêng uĕh lơn, ntŭk ntô hun hao pơk hvi, geh mông nar bah du nkual dôl hun hao, ndrŏng uĕh n’hanh hun hao têh dăng tâm năm tât. Kruanh dak đă Phú Yên uănh mĭn ndâk njêng rmôt cán bộ tŏng uĕh nuih n’hâm dơi tâm di nău ŭch pah kan, tă bah nĕ nta an nău nsing nơm an ƀon lan, nău rnơm an nuĭh ntuh kơl, rgop đăp mpăn rnă njrăng, chính trị, đăp mpăn nău rêh jêng ta ntŭk.