Ôi 16/6, ta Ninh Thuận, Kruanh dak Võ Văn Thưởng pah kan đah Tỉnh ủy Ninh Thuận mpeh nău an tĭng ƀư Nghị quyết Đại hội XIII bah Đảng n’hanh Nghị quyết Đại hội Đảng bộ n’gor tâl XIV. Lôch djăt nău rgop ta rơh pah kan, Kruanh dak rnê âk n’gor hŏ ƀư lôch jêh 22 n’glău dak bât rnoh dăng n’gâr têh 520 rkeh m3 tŏng an dak dŏng sa, tuch tăm mât rong; jêng ntŭk rgum yơng tui ntil dŭt têh bah lam dak. Rnoh âk năch pâl nđaih hăn tât n’gor nar lơn ma âk.

Trong kan văn hóa – rêh jêng kon nuĭh dơi ŭanh khlay. Nchŏng luh du đêt trong kol khan hun hao bah Ninh Thuận, Kruanh dak Võ Văn Thưởng dăn đă, Đảng bộ, n’gâng kan n’hanh ƀon lan n’gor ân tĭng  ƀư tay nghị quyết đại hội Đảng ăp gưl, đah nău  mĭn đăt ndal, trong uănh têh jong, njêng suan ntrôl mhe gay ntrŭt ntrôl hun hao wăng sa- rêh jêng kon nuĭh ngăch n’hanh nâp dăng. Kruanh dak dăn đă n’gor rdâk nkah tay nuih n’hâm rhơn nđơr, nuih n’hâm tâm rnglăp, nsrôih nsan hao êng, suan dăng nơm, nău way ơm lịch sử, văn hóa, kon nuĭh Ninh Thuận; rdâk njêng jâng văn hóa hun hao lam lĕ rngôch kon nuĭh Ninh Thuận.

Măng 15/6, Kruanh dak hŏ tât râng Lễ wơt Bằng nchih săk bah UNESCO đah nău blău mon uk bah nuĭh Chăm tâm săk nchih drăp ndơ ơm yău ntlơi an tay văn hóa mô mpơl săk ân mât njrăng ngăch n’hanh ntơm pơk Lễ hội Nho - Vang Ninh Thuận năm 2023.