Dơn nău jă bah Tổng thống Hợp chủng quốc Hoa Kỳ Joe Biden, nar nđaơ (14/11), Kruanh dak Võ Văn Thưởng n’hanh I ur ndrel mpôl đại biểu Gưl prêh Việt Nam hăn trong râng Pơh lễ Gưl prêh APEC 2023 n’hanh tâm rgop nău ƀư ăp ding ta Hoa Kỳ bah nar 14 tât 17/11. Tâm 25 năm râng APEC, Việt Nam lĕ rgop uĕh, mĭn nchrăp lor đah rƀŭn nchră APEC, dăn đă âk nău rgop, nău nchrăp ƀư kan ndrel dơi ăp dak uănh lah prêh; rgop ntrôl đăp mpăn, kan ndrel, tâm rgop wăng sa nkual, mât uĕh ƀư tơm bah APEC lah trong ƀư boăt nthoi wăng sa bôk năp ta châu Á-Thái Bình Dương.

Đah nkô̆ nău khlay bah Rƀŭn nchră ăp nuĭh kruanh wăng sa APEC năm aơ n’hanh tâm rnôk tâm boh Việt Nam-Hoa Kỳ hun hao têh dăng tay năm bah năp, rơh pah kan râng rƀŭn nchră Gưl prêh APEC n’hanh ăp nău ƀư ta Hoa Kỳ bah Kruanh dak Võ Văn Thưởng geh nkô̆ nău dŭt khlay. n’ăp tâm ăp nău ƀư ăp ding n’hanh ăp dak, rgop mât uĕh tay n’hanh nâp nâl ntŭk ntoh măt nchră nău bah dih tâm rnglăp, đăp mpăn, dơh an hun hao bah neh dak.