Ntoh ngơi ta rơh lễ rgŏ jă, kruanh dak Võ Văn Thưởng lah na nê̆ ƀư tĭng nău ntĭm nti bâh wa Hồ têh kuăng: “năm mhe lah tết tăm tơm si- ƀư an neh dak ăp nar lơ ma ueh nđir”, bâh khay năm mhe năm 1960 tât aƀaơ, ăp tơ̆ tât tết năm mhe sĭt, ƀon lan he geh ƀư “tết tăm tơm si”.

Kruanh dak uch tâm let năp tay, ăp gâl ủy, n’gâng kan, Mặt trận ngih dak, ntŭk kan n’hanh ƀon lan Tuyên Quang đah nău way ơm ƀon tơm cách mạng ntoh ang, đah nău ŭch rŏng rdâk njêng ƀon tơm neh dak ăp nar lơ ma ueh lơn n’hanh têh ndrong, mbra geh nău nchrăp n’hanh pah kan na nê̆, răp jăp, an geh n’hao tay ăp nău dơi lĕ geh, ndâk nsơm nău knơm, nău dơi bâh n’gor mpeh bri gle n’hanh neh bri, ndrel đah tơm tơm si ƀư bri, mât nău ueh sinh hoc đah mât rbăy nău ueh văn hóa way ơm, rdâk njêng nkual ƀon lan mhe, n’hao ueh nău rêh an ƀon lan, ntop rdâk njêng n’gor Tuyên Quang hun hao ngăch n’hanh nâp nâl.