Ôi 30/1, jêh rnôk Ƀư wơt gưl ngih dak ta Ntŭk kruanh dak, Kruanh dak Võ Văn Thưởng lĕ geh rơh rgum nchră đah Tổng thống Philippines Ferdinand Romualdez Marcos Jr. Ta rgum nchră, 2 nuĭh kruanh uănh lah prêh nău hun hao bah tâm boh ăp ding năm bah năp, lơn lah jêh rnôk n’hao tâm boh kan ndrel năm 2015. Tâm boh chính trị, nchră nău nar lơ dơi nâp nâl mâp uĕh ăp rơh tâm mâp, tâm rgâl mpôl gưl prêh n’hanh ăp gưl; ăp trong ƀư kan ndrel ăp ding dơi mbơh ƀư săk rnglăy.

Mpeh trongg nchrŏng hun hao tâm boh 2 dak tâm năm tât, 2 nuĭh kruanh tâm ban ŭch n’hao lơn tay kan ndrel chính trị, nchră nău tă bah n’hao tâm rgâl rơh khâl n’hanh tâm mâp gưl prêh n’hanh ăp gưl; ndrel tâm rgop ndâk njêng bôk nău kan ƀư tâm boh kan ndrel lvang 2025-2030. Mpeh nău Biển Đông, 2 ding ton mât n’hanh ntrŭt ntrôl đăp mpăn, rnă njrăng, đăp mpăn n’hanh dah rŏng trong dak lêng n’hanh trong ndeh păr; mô kuăl jă ăp ding ât, mô ntêt nkri tâm lơh mô lah dŏng tâm lơh, ryơk tŏng ăp trong nchră nău, pháp lý, mkra tâm pit đah trong đăp mpăn tĭng nkô̆ nău way bah luật pháp lam ntŭr neh, tâm nĕ geh Công ước Luật dak lêng năm 1982 (UNCLOS).