Kêng măng lơ 22/8, ta ntŭk kan kruanh dak, kruanh dak Võ Văn Thưởng vơt wa Viengthong Siphandon (Viêng thông Si phan đon), Bí thư Trung ương Đảng Nhân dân Cách mạng Lào, Chánh án Tòa án nhân dân gâl Lào dôl geh rơh tât khâl n’hanh pah kan ta Việt Nam.

Kruanh dak Võ Văn Thưởng vơt rhơn wa Viengthong Siphandon n’hanh mpôl pah kan bâh Tòa án nhân dân gâl têh Lào tât khâl, pah kan đah Tòa án nhân dân gâl têh Việt Nam; knơm ta rơh tât khâl mbra geh mât ueh jăp tay lơn nău tâm boh tâm kơl đah 2 Tòa án 2 dak, nkre lah tâm rgop bun dăp ueh nău tâm boh tâm rnglăp têh kuăng, tâm rnglăp khlăy, tâm kơl lĕ rngôch Việt Nam-Lào. Nău mbơh đah kruanh dak mpeh nău geh rơh tâm nchră đah Chánh án Tòa án nhân dân gâl têh Việt Nam Nguyễn Hòa Bình, wa Viengthong Siphandon an gĭt, bar ding lĕ tâm mbơh ăp nkô̆ nău, trong tâm kơl, dơn ngoăy an geh hun hao tay, ƀư tĭng nău dơi geh bâh “Năm tâm rnglăp tâm kơl Việt Nam-Lào, Lào- việt Nam”. Bar ding lĕ dơn ngoăy n’hao nău way ơm ueh bâh nău tâm boh kan khlăy Việt Nam-Lào ma ăp rơh leo kan 2 dak lĕ bun dăp.