Kêng măng 24/5, wơt ăp Đại sứ ăp dak Qatar, Brazil, Slovenia, Bồ Đào Nha, Estonia n’hanh Guinea hao ndơ̆ siƀŭt neh dak dơn nău kan ta Việt Nam, Kruanh dak Võ Văn Thưởng lah rjăp, ăp nhih pah kan dơi kan bah Việt Nam mbra nta trong dơh gay ăp Đại sứ ntrŭt ntrôl tâm boh bar ding đah Việt Nam nar lơn ma hun hao dăng. Wơt Đại sứ Qatar Khalid Ali Abdullah Abel, Kruanh dak rhơn mpeh tâm boh tâm rnglăp, tâm boh đah bar dak hun hao nsrôih uĕh, way tâm khâl ăp gưl, mhe aơ lah hăn khâl ngăn Qatar bah Groi kruanh dak Võ Thị Ánh Xuân (5/2023).

Kruanh dak dăn đă Wa Đại sứ tâm năm kan bah he ntrŭt ntrôl tâm boh bar dak mpeh ăp ntil n’hanh mpơl nău mpŏng ơm wơt kađăch Qatar Sheikh Tamim bin Hamad Al-Thani khâl Việt Nam tâm năm 2023. Wơt Đại sứ Brazil Marco Farani, Kruanh dak Võ Văn Thưởng lah rjăp Việt Nam way uănh khlay n’hanh ŭch rŏng n’hao dăng lơn đŏng tâm boh tâm rnglăp n’hanh tâm boh wăng sa lam lĕ rngôch đah Brazil. Ta ăp rơh wơt, Kruanh dak Võ Văn Thưởng lah uĕh n’hanh rnê âk ăp dak ŭch tĭng nău mĭn bah ASEAN n’hanh Việt Nam mpeh nkô̆ nău dak  lêng, nkra ăp nău tâm pit ma ăp trong nkra đăp mpăn nsing ta nău uănh khlay pháp luật, lơn lah UNCLOS 1982, mât đăp mpăn  rnă njrăng, dah rŏng nchuăn rdeng dak lêng n’hanh trong trôk; mât đăp mpăn n’hanh hun hao ta nkual.