Kêng măng ntri (13/11), ta Nhih pah kan kruanh dak, kruanh dak Võ Văn Thưởng wơt Đại tướng Tea Seiha, Groi Thủ tướng, Bộ trưởng Quốc phòng Campuchia dôl geh hăn khâl Việt Nam. Kruanh dak Võ Văn Thưởng rnê âk nău lôch jêh tâm nchră geh nău dơi đah bar Bộ trưởng Quốc phòng bar dak; nkre lah rjăp, Đảng, Ngih dak Việt Nam way ntrŭt nsôr, ŭch kơl, nta trong dơh gay tâm boh đah bar tahen, bar Bộ Quốc phòng Việt Nam-Campuchia nar lơn ma ngăn ngăn, geh nău tam.

Tâm rnôk nô nău lam nkual n’hanh lam ntŭr neh geh âk nău tât duh jêr, mô gĭt năl lor, Kruanh dak Võ Văn Thưởng ŭch rŏng bar Bộ Quốc phòng n’hao dăng kan nsum nkoch nău lư njrăng n’gang neh dak, nkoch  mpeh ăp nkô̆ nău tâm nkual, dak bah dih gay tâm boh nar lơn ma uĕh lăng lơn. Bar ding ân kan nsum tay lhăt, tĭng ƀư ăp nău tâm ton tâm boh hŏ geh, uănh khlay tay tâm boh tâm trong ntĭm nti, tiăr nti, kơi năp nău gĭt blău kan sĩ quan, lơn lah sĩ quan mom.