Dơn nău jă bah Trung ương Đảng he, Mpôl ntơh măt gưl têh Đảng Cộng sản Cu-ba tă bah Ủy viên Bộ Chính trị, Rnâng kan Ban Bí thư Đảng Cộng sản Cuba Roberto Morales Ojeda, leo mpôl hăn khâl n’hanh pah kan ta Việt Nam n’hanh ndrel ƀư tơm Tâm nchră Lý luận tâl V đah bar Đảng, ntơm bah nar 30/4 tât nar 4/5/2023. Kêng măng 3/5, ta Nhih pah kan kruanh dak, Kruanh dak Võ Văn Thưởng wơt dêh bên Mpôl ntơh măt gưl têh Đảng Cộng sản Cuba. Kruan dak Võ Văn Thưởng mpơl nău rhơn mpeh nău hun hao uĕh lăng bah tâm boh bar Đảng, bar dak tâm ăp năm rlău aơ; lah rjăp Việt Nam way groi nđôi n’hanh dŭt n’hâm tâm pă jêr jŏt, ntul rlong tă bah mpăng lhăt trong tăch rgâl n’hanh tât khuch trôk nar lơh mhe aơ; nsing nơm Đảng, Ngih dak n’hanh ƀon lan Cuba mbra geh tay nău dơi têh kuâng lơn đŏng kalơ trong hăn mât njrăng nău dơi cách mạng, rdâk njêng chủ nghĩa xã hội kalơ gôl dak dah rŏng n’hanh lah chông cờ bôk năp ta Mỹ Latinh. Kruanh dak dăn đă bar ding pơk hvi tay n’hanh n’hao nău dơi tam tâm boh đah bar dak ta ăp trong kan; kan nsum lhăt, tâm kơl nsum ta ăp rgum nchră lam ntŭr neh; ntrŭt ntrôl tâm boh tâm di đah nô nău ngăn geh, săk geh n’hanh suan dăng tâm boh đah bar đảng, bar dak.

Bah năp nê, lơ 3/5, Đảng Cộng sản Việt Nam ndrel Đảng Cộng sản Cuba hŏ ƀư tâm nchră Lý luận tal V. Tâm nchră geh nkô̆ “Du đê̆ nau kan lý luận ndrel nau ngăn mpeh ndâk njêng xã hội chủ nghĩa ta Việt Nam ndrel Cuba”. Râng tâm nchră geh ăp rđau kan gưl prêh bah 2 Đảng, rđau ăp ntŭk kan, n’gâng kan, ăp nŭih mĭn njêng lý luận ndrel khoa học bah Việt Nam ndrel Cuba. Ntoh nau tâm nar ntơm nchră nau, wa Nguyễn Xuân Thắng, Giám đốc Học viện Chính trị Quốc gia Hồ Chí Minh, lah rjăp, nau pă nkoch nau tă blau, nau kan lý luận ndrel nau ngăn tâm rnôk ndâk njêng chủ nghĩa xã hội ta Việt Nam ndrel Cuba lah nkô̆ nau tâm boh khlay đah 2 Đảng gay n’hao nau tâm gĭt rbăng nsum, ƀư rjăp ndrel ntrŭt dăng lơn tay nau tâm boh ueh lăng đah bar Đảng ndrel ƀon lan bar dak. Tâm rnôk tâm nchră, ăp ntoh măt ndrel ăp nŭih kan lý luận, nau mĭn bah 2 Đảng hŏ mbơh nau ndrel rgop tât lý luận ndrel nau ngăn bah ăp nkô̆ geh nau mhe kơt: Ndâk njêng ndrel hun hao ntŭk kan đảng tâm ăp nau kan văng sa, ndâk njêng ndrel hun hao rmôt cán bộ, ngăn lah cán bộ tơm, nau kan ntĭm nti nau mĭn ân mom ndăm, nŭih rđau kan nkoch mbơh, mât đăp mpăn tâm trong mạng, ndâk nau kan văng sa tĭng xã hội chủ nghĩa bah Việt Nam ndrel ƀư ueh nau kan văng sa, rêh jêng bah Cuba./.