Kêng măng 21/4, ta nhih pah kan kruanh dak, kruanh dak Võ Văn Thưởng wơt Thủ tướng Cộng hòa Séc (Czech) Petr Fiala nkhêp geh hăn khâl ngăn Việt Nam. Kruanh dak Võ Văn Thưởng nsing nơm hăn khâl mbra rgop khlay ntrôl dăng tâm boh tâm rnglăp way ơm n’hanh tâm boh âk ntil đah Việt Nam n’hanh Séc.

Kruanh dak lah rjăp, Ngih dak n’hanh ƀon lan Việt Nam way uănh khlay n’hanh ŭch rŏng ntrŭt ntrôl tâm boh tâm rnglăp way ơm đah bar dak n’hanh jŏ rlău 70 năm tâm boh ta lĕ rngôch ăp trong kan. Bar ding tâm ban ŭch tâm boh lhăt, tâm kơl nsum ta ăp rgum nchră âk ding, lam ntŭr neh, lơn lah ta Liên hợp quốc, ASEM, tâm boh ASEAN – EU gay rgop an đăp mpăn, tâm boh n’hanh hun hao ta nkual n’hanh lam ntŭr neh. Nkô̆ nău rnă njrăng, tâm nê geh Biển Đông, kruanh rđău kan bar ding lah rjăp nău  khlay ân nkra ăp nău tâm boh ma trong đăp mpăn, lĕ ma tâm boh dak bah dih n’hanh nău tâm di đah luật pháp dak bah dih, lơn lah Công ước bah Liên hợp quốc mpeh Luật Biển (UNCLOS) 1982.