Kêng măng 27/3, ta Hà Nội, Kruanh dak Võ Văn Thưởng wơt wa bu ur Michelle Bachelet - Tổng thống ơm Chile dôl gŭ khâl Việt Nam. Kruanh dak an lah, nău bar ding mât ăp rơh tâm hăn khâl nsum, lơn lah mpôl kan  gưl têh đah bar dak, geh nkô̆ khlay tâm ntrŭt ntrôl hun hao tâm boh đah bar dak.

Kruanh dak rnê âk wa Michelle Bachelet kalơ nău kan ƀư cao ủy nhân quyền bah Liên Hợp quốc hŏ geh âk nău rgop tâm nău kan nsum bah Liên hợp quốc n'hanh nsum mpôl lam ntŭr neh. Mpeh săk geh tâm boh bar ding, wa Michelle Bachelet an lah, lĕ ma Việt Nam n'hanh Chile lah dak lăp kan nsum tâm Hội đồng nhân quyền Liên hợp quốc; ndrel râng Hiệp định Tâm boh lam lĕ rngôch n'hanh rgâl mhe rloh rlău Thái Bình Dương. Aơ lah ntŭk nsum khlay gay bar dak n'hao dăng tâm boh let năp tay. Wa Michelle Bachelet dăn đă bar ding tâm boh, nsum ti tĭng ƀư ăp rnoh tât kan nsum bah lam ntŭr neh yor an đăp mpăn n'hanh hun hao.