VOV4.M’nông: Kêng măng 4/4, Rmôt hăn kan bah Trung ương yor wa Y Thanh Hà Niê Kđăm, Kruanh Hội đồng Dân tộc Quốc hội hŏ tât khâl ndrel rhơn tết vay ơm Col Chnam Thmay bah rnoi Khmer tâm chùa Som-Rong, Phường 5, nkuăl ƀon têh Sóc Trăng. Wa Y Thanh Hà Niê Kđăm, Kruanh Hội đồng Dân tộc bah Quốc hội ntoh nau rhơn rnôk tât khâl ăp nŭih tâm chùa, hoà thượng, thượng toạ tâm chùa Som-Rong.

Di rnôk tết Chol Chnam Thmay dăch tât. Kruanh Hội đồng Dân tộc Quốc hội njoăl nau rhơn tât ăp nŭih tâm chùa, hoà thượng, thượng toạ chùa Som-rong năm mhe geh n’hâm soan ueh lăng ndrel đăp mpăn. Nkre ŭch, tâm rơh tât, rnâng kan mât chùa mra lŏ bonh đă kon chroh kơt tĭng nau ntrŭnh, ntrong kan bah Đảng, Pháp luật bah Ngih dak, ndâk ƀon lan Sóc Trăng nar lơn sâm geh, rgop nau ndâk nau tâm rnglăp rnoi mpôl bah neh dak nơm./.

Nŭih rblang: H’Thi