VOV4.Mnông- Măng nar 7/3, ta ntŭk kan n’gâng kan nchră nău đah dak bah dih, kruanh n’gâng kan nchră nău đah dak bah dih Bùi Thanh Sơn lĕ geh rơh tâm nchră đah kruanh n’gâng kan nchră nău đah dak bah dih Rumani Bogdan Aurescu. Ta rơh tâm nchră, kruanh n’gâng kan Bùi Thanh Sơn lah na nê̆ Việt Nam uănh khlăy n’hanh ŭch geh ƀư kloh ueh tay lơn nău tâm boh tâm rnglăp way ơm đah nău jŏ rlău 70 năm đah Việt Nam n’hanh Rumani. Bar hê kruanh n’gâng kan nchră nău đah dak bah dih lĕ tâm mbơh âk trong kan na nê̆ gay ma n’hao pơk hvi n’hanh ƀư kloh tay lơn nău tâm boh tâm rnglăp way ơm đah bar dak, tâm nĕ nău tâm rgop ntrôl ăp rơh tât khâl gâl têh n’hanh tâm mâp ăp gâl kan mât nău mbơh ôp nău chính trị. Ủy ban nchră nău mpeh tâm kơl wăng sa, tăch rgâl n’hanh ntuh kơl Việt Nam- Rumani, n’hao nău tâm kơl ta ăp trong kan way ơm kơt ntĭm nti, văn hóa , pâl nđaih tâm ban kơt ntrôl dăng ăp trong kan geh nău dơi mhe kơt pah kan, tuch tăm.

Nuĭh rblang: Thị Đoắt