VOV4.M’nông -  Tâm ăp nar bôk năm mhe, kruanh N’gor ủy, UBND n’hanh HĐND n’gor Dak Lak lĕ tât khâl, mâp măt cán bộ nuĭh kan du đêt công ty, ntŭk kan ta n’gor gay ntrŭt nsôr ăp ntŭk kan rlet rlău jêr jŏt ngăch nkra njêng. Na nê̆, ăp mpôl pah kan bah N’gor ủy, UBND n’hanh HĐND n’gor Dak Lak lĕ tât khâl n’hanh mâp măt bôk năp đah cán bộ, phung pah kan Công ty Cổ phần pring xăng Nam Tây Nguyên, Công ty cà phê Thắng Lợi, Công ty Cổ phần Thép Đông Nam Á n’hanh du đêt ntŭk nkra njêng ta lam n’gor.

Bí thư n’gor ủy Dak Lak Nguyễn Đình Trung lì xì bôk năm an phung pah kan Công ty Cổ phần Bia Sài Gàn-miền Trung.

Ta Công ty Cổ phần Bia Sài Gòn-miền Trung, wa Nguyễn Đình Trung, Bí thư N’gor ủy Dak Lak ndrel mpôl pah kan lĕ djăt nău mbơh nu nău kan bah Công ty, hăn khâl nkual nkra njêng n’hanh mâp măt nkoch bri đah ăp phung pah kan. Bí thư N’gor ủy Dak Lak uănh lah prêh ăp nsrôih bah Công ty rnôk lĕ rlet rlău âk jêr jŏt yor srê gay đăp mpăn nkra njêng, mô geh du hê nuĭh ntưp Covid-19.

Nuĭh rblang: Y Sưng Phê Ja