VOV4.M’nông –  Tâm 2 nar lơ 19 n’hanh 20/1, Mpôl pah kan bah N’gor ủy, HĐND, UBND, UBMTTQ Việt Nam n’gor Kon Tum lĕ tât khâl, mbah rhơn Tết rmôt n’har bri, n’gâng kan n’hanh nuĭh ƀon lan ta nkual n’har bri kâp n’har dak băl Lào.

Bí thư N’gor ủy Kon Tum Dương Văn Trang (nuĭh ndô môp) mbah rhơn Tết, an ndơ rnăk ach o ƀon Bung Tôn, xă Đăk Plô, nkuăl Đăk Glei.

Tât khâl, mbah rhơn Tết cán bộ, tahen ăp Pôih N’har bri, n’gâng kan n’hanh nuĭh ƀon lan 3 xă n’har bri kâng n’har dak Lào, geh: Đăk Plô, Đăk Nhoong, nkuăl Đăk Glei; Đăk Dục, nkuăl Ngọc Hồi, Bí thư N’gor ủy, Kruanh HĐND n’gor Kon Tum Dương Văn Trang ndrel ăp Mpôl pah kan đêp rmên ôp khâl mpeh trong kan nchrăp wơt Tết, an ndơ an cán bộ, tahen n’har bri, n’gâng kan ƀon lan n’hanh nuĭh ƀon lan.

Bí thư N’gor ủy Kon Tum Dương Văn Trang mbah rhơn Tết, an ndơ cán bộ tahen n’har bri

Mpôl pah kan tât khân, mbah rhơn Tết, an ndơ du đêt rnăk geh soan đah cách mạng ta xă Đăk Plô, Đăk Nhoong, nkuăl Đăk Glei n’hanh xă Đăk Dục, nkuăl Ngọc Hồi. Di rơh aơ du đêt doanh nhân n’hanh doanh nghiệp hăn ndrel Mpôl kan mbah rhơn Tết lĕ an 600 nklâm ndơ, du nklâm 500 rbăn prăk an nuĭh ƀon lan 3 xă n’har bri.