Kruanh Quốc hội Vương Đình Huệ khâl, nkoch bri đah cán bộ nuĭh kan Đại sứ quán Việt Nam ta Cuba.

Tâm rnôk hăn khâl ngăn dak Cộng hoà Cuba, ôi 19/4, (tĭng mông ta ntŭk, măng 19/4 tĭng mông Việt Nam) ta Thủ đô La Habana, Kruanh Quốc hội Vương Đình Huệ n’hanh mpôl ntơh măt gưl têh Quốc hội Việt Nam khâl, nkoch bri đah cán bộ nuĭh kan Đại sứ quán Việt Nam n’hanh ntơh măt nuĭh Việt Nam ta Cuba.

Lah ta rơh mâp măt, Kruanh Quốc hội Vương Đình Huệ nkoch nău rhơn dơi plơ̆ khâl tay neh dak Cuba uĕh reh; mâp cán bộ, nuĭh kan Đại sứ quán Việt Nam n’hanh ntơh măt nuĭh Việt Nam ta Cuba, du ntŭk gŭ kan dŭt ngai ƀon tơm ta mpeh bah ri play neh. Kruanh Quốc hội an gĭt, aơ lah hăn khâl gưl dŭt têh bah Kruanh rđău kan Việt Nam tât Cuba kơp ntơm bah năm 2022 tât aƀaơ. Rlău ma nău kan tơm bah mpôl hăn hôm geh ăp nău kan bah ăp nuĭh tâm mpôl hăn đŏng, ăp n’gâng kan, ăp n’gor, doanh nghiệp gay ntrŭt ntrôl tâm boh bar dak. Kruanh Quốc hội Vương Đình Huệ đă đại sứ, Đại sứ quán, mpôl doanh nghiệp dôl ntuh kơl ta Cuba rêng lam nău dơi; n’hao dăng tâm boh. Kruanh Quốc hội ŭch rŏng, mpôl nuĭh Việt Nam ta Cuba tâm nkrum mât nsum, tâm rnglăp lơn đŏng, gay tâm pă, tâm nkoch nsum. Nuih n’hâm, han săk ân tâm ban kơt đah neh dak Cuba đŏng.