Kêng măng nar 4/8, tâm rnôk hăn khâl Indonesia, Kruanh Quốc hội Vương Đình Huệ hŏ ôp srĭng nău đah wa Megawati Suekarnoputri, Tổng thống ơm Indonesia, Kruanh đảng Dân chủ Indonesia rlăch ndăng. Kruanh Quốc hội Vương Đình Huệ n’hanh wa Megawati tâm ban ŭch let năp tay, ăp nhih pah kan geh tât bah Việt Nam n’hanh Indonesia ân lor dăn đă  ăp trong nkra geh nău tam  n’hanh  ngăn ngăn gay n’hao dăng lơn đŏng tâm boh đah bar dak ta lĕ rngôch ăp trong kan, ăp gưl, lơn lah trong kan Đảng yor aơ lah jâng nsing gay bar dak hun hao tay tâm boh tâm rnglăp, krêp dêh đah băl tâm boh jŏ jong.

Bar ding tâm ban ŭch ntrôl dăng tâm boh đah ăp nhih pah kan gŭ mĭn, lý luận bah bar dak, lơn lah đah Nhih pah kan Lý luận tư tưởng Pancasila n’hanh Nhih pah kan gŭ mĭn  n’hanh joi trong mhe bah Indonesia tă bah wa Megawati ƀư Kruanh đah Hội đồng Lý luận Trung ương, Viện Hàn lâm Khoa học Xã hội Việt Nam, Viện Hàn lâm Khoa học n’hanh Công nghệ. Nkhêp geh rnôk dja, Kruanh Quốc hội Vương Đình Huệ njuăl nău bah Tổng Bí thư Nguyễn Phú Trọng n’hanh ăp kruanh rđău kan gưl têh Việt Nam jă wa Megawati khâl tay Việt Nam. Wa Megawati rhơn mƀak dơn nău jă n’hanh lah rjăp mbra ơm hăn khâl Việt Nam.