VOV4.M’nông – Kêng măng 20/3, ta nkual ƀon têh Hồ Chí Minh, Kruanh Quốc hội Vương Đình Huệ lĕ pah kan đah Ban thường vụ Thành ủy nkual ƀon têh Hồ Chí Minh mpeh săk rnglăy trong kan ntĭm rđău, ƀĭt joet n’hanh săk rnglăy ƀư tĭng trong nchrăp hun hao wăng sa-rêh jêng nkual ƀon têh Hồ Chí Minh năm 2021, nău kan khlay năm 2022; săk rnglăy mbơh ƀư Nghị quyết 54 bah Quốc hội mpeh rlong ƀư trong kan, nău kơl êng hun hao nkual ƀon têh Hồ Chí Minh.

Kruanh Quốc hội pah kan đah Ban thường vụ Thành ủy nkual ƀon têh Hồ Chí Minh

Mpeh trong rƀŏng, nău kan năm tât Kruanh Quốc hội Vương Đình Huệ đă kruanh Nkual ƀon têh Hồ Chí Minh an n’hao ndâk njêng, ntrŭt uănh tay Đảng n’hanh trong chính trị kloh uĕh, nâp dăng; ndâk njêng tâm rnglăp, tâm ban ŭch, ndrel soan, ndrel nuih n’hâm. Rgum trong kan ndâk njêng trong ƀư, tĭng Nghị quyết Đại hội 13 bah Đảng n’hanh Nghị quyết Đại hội Đảng bộ nkual ƀon têh rơh tal 11, kơp uănh tay ăp bôk nău kan ƀư, ơm geh ăp trong ƀư hun hao wăng sa-rêh jêng, ăp nău rƀŏng, rnoh an ƀư, nău kan gay nkra rgâl, ntop tay tŏng ăp tâm di.

Nŭih blang: Y Sưng Phê Ja