Ntoh ngơi ta rơh mbơh nău nchrăp kan, Groi Thủ tướng Trần Hồng Hà an gĭt, nău nchrăp kan n’gor Phú Yên geh rdâk njêng đah nău mĭn kan mhe, nău mpŏng kan jŏ jong n’hanh knơm ta nău dơi êng mpeh ăp rnoh kan mpeh ndơ si gle n’hanh văn hóa. Nău nchrăp kan ta n’gor mbra lah nău kan lĕ rngôch bâh ăp nău nchrăp kan, geh nău kan dŭt khlăy uănh năl ntŭk hun hao tâm rgop kan na nê̆ đah ăp n’gor ta Nam Trung Bộ n’hanh Tây Nguyên. Gay ma dơi geh ăp nkô̆ mpŏng kan aơ, groi Thủ tướng Chính phủ Trần Hồng Hà đă Phú Yên an geh rhoăt luh ăp nău tă gĭt kan hun hao ăp ntŭk tâm nkual, an geh rgâl mhe mĭn kan, joi trong hăn mhe êng gay ma Phú Yên jêng ta ntŭk tâm di an ntuh kơl, tâm di tâm rgop kan, tâm di uănh gĭt. Nău nchrăp kan n’gor Phú Yên lĕ geh uănh năl na nê̆ trong hun hao Phú Yên tâm let năp tay knơm ta du nău kan tơm, 2 trong kan bah dih, 3 nău kan n’gâng, 4 nău kan mhe, 5 trong kan tơm đah nkô̆ nău ngluh mbơh nchrăp tât năm 2030, Phú Yên jêng n’gor hun hao tĭng trong ueh mhe n’hanh nâp nâl.

Pah kan đah nuĭh leo kan n’gor Phú Yên, kruanh Quốc hội Vương Đình Huệ đă Đảng bộ, n’gâng kan n’hanh ƀon lan n’gor Phú Yên an geh mbơh tơih geh săk rnglăy ăp nghị quyết bâh Trung ương Đảng, Quốc hội, chính phủ, nău kan tơm geh mât hun hao, ndâk nsơm ăp nău kŏ văk gay ma geh ƀư tĭng an dơi nău mpŏng kan năm 2024 n’hanh lĕ năm kan, n’gor an geh nsrôih, joi ăp nău êng gay ma hun hao, nĕ lah nău ueh êng geh mpeh drăp ndơ, si gle, nkual neh, nău ueh êng.

Ta năp nĕ, kruanh Quốc hội Vương Đình Huệ pah kan đah rnâng kan n’gor Ủy Khánh Hòa mpeh nău geh ƀư tĭng nău kan chính trị năm 2023, trong kan năm 2024 n’hanh uănh năl nău geh mbơh tơih ƀư tĭng Nghị quyết mbrô 55 bâh Quốc hội mpeh rlong ƀư du đê̆ nău kan, trong kơl kan an hun hao n’gor Khánh Hòa n’hanh râng rơh mbơh tơih nău nchrăp nkuăl ƀon têh mhe Cam Lâm, Khánh Hòa.