VOV4.M’nông-Nchrăp an nău kan uănh nđôi bôk nău kan mpeh ƀư tĭng nău kơl pháp luật mpeh dŏng mpêt nkrem, njrăng mpŭng lir lvang năm 2016-2021, ôi nar 23/8, ta ntŭk kan Quốc hội, kruanh Quốc hội Vương Đình Huệ tât râng rơh pah kan bâh mpôl kan uănh nđôi Quốc hội đah n’gâng kan tơm prăk. Ntoh ngơi ta rơh pah kan, kruanh Quốc hội đă n’gâng kan tơm prăk an geh uănh gĭt na nê̆ dŏng mpêt nkrem mpeh tơm prăk mô dơn kơt kăp trăy gay ma koh n’huch nău dŏng ma an tâm di đah nău mĭn bâh Luật dŏng mpêt nkrem, njrăng mpŭng lir. Tĭng nău mbơh bâh kruanh n’gâng kan tơm prăk Hồ Đức Phớc, bâh năm 2016 tât năm 2021, ăp ntŭk kan bâh n’gâng kan tơm prăk lĕ geh dŏng mpêt nkrem rlău 6 rbăn rmen prăk tâm nău kan nchih, uănh năl, an dŏng nău nchrăp dŏng tơm prăk, mât uănh, dŏng rnoh tơm prăk ngih dak. Kơp tât năm 2021 n’gâng kan tơm prăk lĕ n’huch rnoh biên chế geh 106% nău nchrăp kan, n’huch 36 ntŭk kan jurr hôm 28 ntŭk kan. Kruanh Quốc hội Vương Đình Huệ lah na nê̆, ƀư dŏng mpêt nkrem, njrăng mpŭng lir mô di lah ăp năm mpêt nkrem dĭng âk prăk, ma khlăy ngăn lah uănh nđôi, doh rklaih ăp nău kŏ văk, jêr jŏt, njêng nău kơl an hun hao gay ma njêng rnoh hun hao nău kan.

Nuĭh rblang: Thị Đoắt