Ntoh ngơi ta rơh tâm mâp, kruanh Quốc hội lah na nê̆, ntŭk kan an geh rgâl mhe nău mĭn mpeh trong kan nău nchrăp nkuăl ƀon têh, mât đăp mpăn nău nchrăp kan nkuăl ƀon têh an geh nău mpŏng kan jŏ jong, tâm ban n’hanh ueh mhe, sŏk kon nuĭh n’hanh nău ueh tâm nău rêh ƀư tơm, nsrôih jut jăng nău mĭn năm kan, nău nchrăp kan mô hoch ƀư, nău kan dăn an geh an rmôt kan tâm nău rdâk njêng, rgâl nkra n’hanh ntop nău nchrăp kan.

Kruanh Quốc hội Vương Đình Huệ lah na nê̆ nău khlăy bâh nău nchrăp kan, ngăn lah nău nchrăp kan nkuăl ƀon têh. Nău ngăn, 75% nău nsrôih an hun hao ta lam ntur neh lah tât bâh nkuăl ƀon têh. Ta rơh tâm mâp, ăp nuĭh kan ndrel bâh ntŭk kan lĕ tâm rgop ta ăp nău nchrăp kan luật neh ntu rgâl mhe, Luật ngih jay gŭ, Luật nchrăp ƀư nkuăl ƀon têh, Luật rdâk njêng, Luật tăch rgâl neh ntu, drăp ndơ...