Ôi 11/8, Kruanh Quốc hội Vương Đình Huệ n’hanh Mpôl ntơh măt gưl têh Quốc hội dak he hŏ jŭr tât tach ndeh păr Nội Bài, dŭt jêh uĕh lăng hăn khâl ngăn Indonesia, Iran. Đah bơi 60 nău kan ta bar dak, mông nar srêt mbâl lôch jŭr tach ndeh păr, hăn khâl ngăn tât bar dak Cộng hòa Indonesia n’hanh râng Đại hội đồng AIPA 44; khâl ngăn dak Cộng hòa Hồi giáo Iran bah Kruanh Quốc hội Vương Đình Huệ n’hanh Mpôl ntơh măt gưl têh Quốc hội dak he hŏ geh âk nău dơi uĕh lăng.

Quốc hội Việt Nam – Indonesia n’hanh Việt Nam – Iran hŏ ký ton tâm boh mhe gay tâm di đah rnôk tâm boh đah bar dak tâm ban kơt n’hao dăng tâm boh đah bar Quốc hội, dơn ngoăy n’hao âk tâm khâl nsum, tâm ôp nău tă ơm gĭt kan tâm ăp trong kan njêng pháp luật tâm ban kơt kan nsum pah kan groi nđôi, kan nsum ta ăp rơh rgum nchră dak bah dih. Bah meng nê, ta rnôk hăn khâl, ăp n’gâng kan geh tât hŏ ký ton âk nău tâm boh ta ăp trong kan êng êng đŏng. Aơ lah jâng ntơm, lah bôk trong khlay an tâm boh bar ding. Râng Đại hội đồng AIPA -44, Kruanh Quốc hội Vương Đình Huệ hŏ geh ăp rơh mâp bar ding gay  tâm ôp ăp trong ntrŭt ntrôl tâm boh lơn đah ăp dak băl tâm  nkual.