Kruanh Quốc hội Vương Đình Huệ ndrel rmôt kan ntoh măt gưl prêh bah Quốc hội Việt Nam hŏ tât khâl Ntŭk kan Fidel Castro Ruz-ntŭk rgum, mât, prăp ndrel ryơk ăp ntil ndơ ơm bah Kruanh rđau kan Cuba gay ma ƀư ân nau kan mĭn njêng ndrel mbơh ăp ntil nau khlay mpeh nau mĭn bah Fidel Castro. Kruanh Quốc hội Vương Đình Huệ ndrel rmôt kan hŏ hăn uănh ntŭk mpla ndơ ăp ntil rup geh nsum ma nau rêh, nau kan cách mạng, mbơh ăp nau khlay bah nau mĭn kan bah Rđau Kan Fidel Castro ndrel nau ueh lăng bah Rđau kan Fidel Castro ân an Việt Nam.

Ntŭk mpla n’hơ Fidel Castro geh ndâk ndrel ntơm leo lăp dŏng di nkah 5 năm nar roh bah rrdau kan Fidel Castro (25/11/2016-25/11/2021). Aơ lah ntŭk rgum bôk năp ndrel geh êng du ntŭk geh moh nŭih rđau kan cách mạng têh dăng bah ƀon lan Cuba. Ngih dak Cuba hŏ ntrŭnh du nau kan khlay mpeh nau ndâk ntŭk aơ yor nau ŭch rnôk hôm rêh bah Fidel lah jêh rnôk roh, mô geh trong hăn, công viên, ngih săm ƀŭt, ngih dak si ma lah ntŭk ƀư nau kan dơi sŏk moh săk păng./.