VOV4.M’nông – Nkhêp di nar báo chí cách mạng Việt Nam 21/6, Kruanh Quốc hội Vương Đình Huệ lĕ tât khâl, pah kan đah Báo Đại biểu Nhân dân. Ntoh ngơi ta aơ, Kruanh Quốc hội Vương Đình Huệ lah rjăp, báo chí lĕ lah di ngăn “n’hâm nsôr bah nău rêh” ta rƀŭn nchră Quốc hội n’hanh trong gay mâp nuĭh ƀon lan, Nuĭh ƀon lan groi nđôi nău ƀư bah Quốc hội lah êng, bah ăp ngih pah kan ngih dak lah nsum. Kruanh Quốc hội Vương Đình Huệ mĭn lah tâm rach năm mrô, Ban ntĭm rđău Báo Đại biểu Nhân dân lĕ mô rlu mĭn ƀư mhe, dŭt n’hâm rgâl nkô̆ nău n’hanh trong mbơh nău, nkoch trêng, mĭn joi ăp trong hăn tâm di, tâm ŭch ngăch đah ăp nău đă mhe bah jâng wăng sa mrô, nău rêh jêng mrô ma dak he dôl rƀŏng tât. Gay n’hao lơn tay săk rnglăy trong kan mbơh nău, nkoch trêng mpeh nău ƀư bah Quốc hội, Kruanh Quốc hội đă Báo Đại biểu nhân dân ƀư uĕh trong kan dăp rgum hun hao, mât uănh tâm di, ƀư jêng tâm ban ŭch âk tĭng trong ƀư, đăp mpăn di nău ntrŭnh, nău rđău bah Đảng, nău kơl, pháp luật bah Ngih dak.

Nuĭh rlang: Y Sưng Phê Ja