Kêng măng 31/1, ta nkuăl ƀon têh Yên Bái, Kruanh Quốc hội Vương Đình Huệ khâl, rhơn tết cán bộ, tahen Trung đoàn Không quân 921, Sư đoàn 371, Quân chủng Phòng không-Không quân di rnôk năm mhe Giáp Thìn 2024 ndrel nkah 60 năm Nar vay ơm bah Trung đoàn (3/2/1964-3/2/2024). Nkoch bri đah cán bộ, tahen Trung đoàn Không quân 921, Kruanh Quốc hội Vương Đình Huệ lah rjăp, rlet rlau 60 năm ndâk, tâm lơh ndrel têh jêng, ăp rơh cán bộ, tahen bah Trung đoàn 921 hŏ mô rlu nsôih ndrel têh jêng, ndâk âk nau dơi têh, ueh ang tâm nau kan ndâk ndrel mât neh dak.

Rơh tât, Kruanh Quốc hội đă Trung đoàn lŏ ntrŭnh ƀư, ân rjăp lơn ăp nau rđau, nau ntrŭnh bah Đảng, nau ntrŭnh pháp luật bah Ngih dak mpeh nau kan mât đăp mpăn neh dak, rnă njrăng. Ăp cán bộ, tahen ân geh lŏ ƀư ueh nau ang “Tahen Wa Hồ” đah nau kan chính trị nâp, nsôih tâm lơh prêh, mra ndơn ndrel ƀư jêh nau kan geh jao, ƀư kan rjăp ma neh dak./.