Nkhêp geh râng Đại hội đồng AIPA tâl 44 ta Jakarta, Indonesia, Kruanh Quốc hội Vương Đình Huệ hŏ geh rơh mâp đah Kruanh Hạ viện Philippines Ferdinand Martin Romualdez. Ta rơh mâp, Kruanh Quốc hội Vương Đình Huệ rhơn rnê ăp njuat hun hao dăng kalơ ăp trong kan bah tâm boh Jêh jong Việt Nam – Philippines, lơn lah tâm mâp gưl têh.

Bar kruanh đău kan tâm ban ŭch ntrŭt ntrôl tâm boh bar dak hun hao ngăn ngăn, lơn lah tâm trong kan wăng sa- tăch rgâl n’hanh ntuh kơl, nsrôih ơm n’hao tăch rgâl bar ding geh tât 10 rmen USD. Kruanh Quốc hội dăn đă Việt Nam n’hanh Philippines ân tâm boh gay hun hao rêng pă an tơm ndơ tăch, nta trong dơh an nău rvăt n’glăp ăp ntil ndơ tơm khlay bah Việt Nam, tâm nê geh phe, lŭ loih rdâk njêng n’hanh ăp ndơ Philippines săk geh n’hanh Việt Nam geh nău ŭch dŏng. Bar ding tâm ban ŭch tâm boh tâm bar trong kan khlay đŏng lah rgâl mbrô n’hanh ndơ̆ rgâl ŭnh nar.