Ƀư tĭng bôk nău kan jêh rơh rƀŭn tal 5, Quốc hội khóa 15, nar nđaơ (4/7), Kruanh Quốc hội Vương Đình Huệ lĕ mâp nuĭh ƀon lan ta nkuăl Vĩnh Bảo, nkual ƀon têh Hải Phòng. Ta rơh mâp, ăp nuĭh ƀon lan bah nkuăl Vĩnh Bảo uănh mĭn tât ăp rmôt nău kơt: Ntŭk ntô gŭ ân; nău kơl mpeh an manh prăk; mât uănh nkual ƀon têh; dăp rgum; dak si, văn hóa, pâl nđaih; mpeh lŏ mir, nuĭh ƀon lan, thôn ƀon; ăp nău kơl mât ndrăy hun hao ƀon nău kan way ơm.

Kruanh Quốc hội Vương Đình Huệ mbơh, tâm khay 7 aơ, Ủy ban Thường vụ Quốc hội mbra an nghị quyết, Chính phủ, ăp n’gâng kan nău kan, ƀon lan lĕ ndâk njêng trong nchrăp an nchrăp ƀư mbơh nău dăp tay ntŭk kan hành chính tâm lvang tât. Kruanh Quốc hội Vương Đình Huệ lĕ ntoh ngơi ƀư kloh ăp nău êng ma nuĭh ƀon lan Vĩnh Bảo nkoch, nkre mĭn lah ăp ngih pah kan dơi kan bah Quốc hội mbra mĭn njêng, djăt nău rgop bah nuĭh ƀon lan, mbơh an Quốc hội, Ủy ban Thường Quốc hội ntrŭnh; njuăl ăp ngih pah kan uănh mĭn tay, mkra ăp nău tĭng nău dơi n’hanh Mpôl đại biểu Quốc hội nkual ƀon têh mbra groi nđôi nău ƀư tĭng di nău ntrŭnh.