VOV4.M'nông: Ôi 9-2, Kruanh Quốc hội Vương Đình Huệ hŏ tât mpoh nhang nkah gĭt ăp nuĭh hăn lor geh n'hâm suan đah neh dak ta Điện Kính Thiên, Nkual têl ơm yău Hoàng thành Thăng Long, Thủ đô Hà Nội. Tâm mông nar huêng khlay ta Hoàng thành Thăng Long, Kruanh Quốc hội Vương Đình Huệ ndrel ăp nuĭh ntơh măt hŏ chŭn mbah chŭt nhang nkah gĭt; ân mbơh ta năp huêng brah ăp nuĭh hăn lor bôk năp geh n'hâm suan đah neh dak mpeh ăp nău dơi rdâk njêng, hun hao neh dak; dăn an neh dak đăp mpăn ƀon lan soih uĕh; nsrôih mât uĕh tay nău way ơm rbăn năm văn hiến, ăp rnoh khlay drăp ndơ ntlơi an tay bah rnoi nuĭh; rdâk ntơm nău ŭch rŏng hun hao neh dak têh ndrŏng, rhơn răm, mât uĕh nău mĭn n'hanh suan dăng tâm rnglăp rnoi nuĭh, ntrôl dăng pah kan rgâl mhe, công nghiệp mhe, uĕh mhe neh dak. Nkoch bri dêh bên đah cán bộ, nuĭh kan Nkual têl ơm yău Hoàng thành Thăng Long, Kruanh Quốc hội Vương Đình Huệ ŭch rŏng, cán bộ, nuĭh kan mât nkual têl ơm yău nsrôih mât rnoh khlay bah Hoàng thành Thăng Long; nsrôih nkoch trêng mpeh rnoh khlay lịch sử bah ntŭk têl ơm yău, rgop rdâk njêng Thủ đô n'hanh neh dak, di đah ăp n'hâm suan nuĭh hăn lor bôk năp./.

Nuĭh rblang: Điểu Thân