Kêng măng 29/3, Kruanh Quốc hội Vương Đình Huệ hŏ geh rơh pah kan đah Bộ Thông tin n'hanh Truyền thông mpeh lôch jêh rgâl mbrô bah Việt Nam. Kruanh Quốc hội rnê âk pah kan nkoch trêng trong kơl, Bộ Thông tin n'hanh Truyền thông hŏ nsrôih nsŏng kơl an Chính phủ gay rgâl nău gĭt êng, trong ƀư tâm pah kan nkoch trêng trong kơl bah ăp nhih pah kan ngih dak.

Tĭng nê, nkoch trêng trong kơl dơi uănh lah du nău kan bah n'gâng kan. Tâm pah kan rdâk njêng, lôch jêh trong đă tĭng, Bộ Thông tin n'hanh truyền thông hŏ dŭt ngăch, nsŏng kơl an Chính phủ gay hao mbơh dăn Quốc hội uănh an dŏng Luật an ninh mạng, Luật rgâl nkra, kơi ntop du đêt nkô̆ bah Luật Tần số vô tuyến điện. Aƀaơ, Luật Giao dịch điện tử (rgâl nkra) hŏ dơi Quốc hội an nău rgop lor bôk năp, nchrăp Quốc hội mbra ŭanh an dŏng ta rơh hop tâl 5 tât. Trong nchrăp Luật Viễn thông (rgâl nkra), tă bah Bộ lah nhih pah kan tơm nchih rgum hŏ dơi n'glăp tâm bôk nău kan rdâk njêng luật, pháp lệnh năm 2023.