Nar 17/7, Kruanh Quốc hội Vương Đình Huệ ndrel mpôl pah kan hŏ pah kan đah Ban Thường vụ Tỉnh ủy Quảng Trị. Rlău 34 năm plơ̆ njêng tay n’gor, Quảng Trị dôl tĭng kơn rgâl mhe n’hanh hun hao. Quảng Trị dôl nar lơn ma nsan hao, rnoh wăng sa nar lơn ma pơk hvi, rgop tâm nău hun hao nsum bah neh dak. Rnoh ngăch hun hao lĕ rngôch ndơ geh ƀư ta n’gor (GRDP) rĭng geh lvang năm 2021-2022 geh 6,9%/năm, 6 khay năm 2023 hao 6,52%.

Nsĭt geh ngân sách Ngih dak năm 2021 geh 160% trong nchrăp sŏk dŏng n’hanh năm 2022 geh 113% trong nchrăp sŏk dŏng. Nău an ƀư Nghị quyết mbrô 43 bah Quốc hội mpeh trong kơl năm dŏng prăk kaih ntop kơl dâk hao tay n’hanh hun hao wăng sa- rêh jêng kon nuĭh n’hanh Nghị quyết mbrô 11 bah Chính phủ mpeh bôk nău  kan dâk hao tay n’hanh hun hao wăng sa- rêh jêng kon nuĭh dơi an ƀư uĕh. Lah rnôk n’glôch jêh rơh pah kan, Kruanh Quốc hội Vương Đình Huệ dăn đă Đảng bộ n’gor ndăn ƀư lôch jêh hồ sơ dăp rgum n’gor Quảng Trị rơh 2021-2030, gay mât dŏng, ntik n’hao săk geh, dơh uĕh bah n’gor; lah rjăp tât ndơ ƀư jêng “nđơr geh đăp mpăn” ta Quảng Trị, Kruanh Quốc hội an lah, lah me neh ât rdâng âk bom ndrak dŭt krit nji tâm 2 rơh tâm lơh tâm su mbro mbrăng bah rnoi nuĭh, Quảng Trị lah ntŭk tâm di gay lah jêng “nđơr geh nău đăp mpăn”.