Kêng măng 2/8, Kruanh Quốc hội Vương Đình Huệ ƀư tơm rơh pah kan đah Ủy ban Kinh tế bah Quốc hội n’hanh du đêt n’gâng kan mpeh du đêt nkô̆ têh bah trong nchrăp Luật neh ntu (rgâl nkra). Lah n’glôch jêh rơh pah kan, Kruanh Quốc hội Vương Đình Huệ lah rjăp, trong nchrăp Luật neh ntu (rgâl nkra) nar 1/8 hŏ dơi rgâl di tay nsing ta nău rgum ăp tŏng n’hanh djăt tĭng jăp, sơch ăp nău rgop bah ăp nuĭh đại biểu Quốc hội tâm rơh hop tâl prăm mhe aơ, an nău rgop bah ăp nhih pah kan bah Quốc hội, ăp nhih pah kan n’hanh mpôl kan dơi kan, nuĭh ƀon lan.

Kruanh Quốc hội lah rjăp đŏng, nhih pah kan ƀư tơm nchih rgum n’hanh Chính phủ hŏ dŭt nsrôih uĕh, kan nsum đah Ủy ban Kinh tế n’hanh ăp nhih pah kan Quốc hội, hŏ rgâl di tay du njuat đŏng lah dŭt ăp tŏng rêng. Tât rnôk dja săk tam luật lah dŭt uĕh n’hanh dôl hăn di trong. Kruanh Quốc hội đă trong nchrăp Luật neh ntu (rgâl nkra) ân đăp mpăn ăp kôp đah ăp luật êng tâm lam rêng kan pháp luật, lơn lah đah ăp trong nchrăp luật ma Quốc hội dôl mĭn uănh, n’glêh an; mô dŏng luật dja ƀư rgâl nău dơi kan bah ăp luật êng ƀa ƀă./.