VOV4.M’nông: Kêng măng 24/1, di nar nchrăp năm mhe Nhâm Dần 2022, Kruanh Quốc hội Vương Đình Huệ ndrel rmôt hăn kan bah Trung ương hŏ râng bôk nau kan “Năm mhe Biên phòng duh răm nuih n’hâm ƀon lan meng dak lêng” tâm Đồn biên phònh Rạch Gốc, nkuăl Ngọc Hiển, n’gor Cà Mau. Ntoh nau tâm bôk nar kan, Kruanh Quốc hội Vương Đình Huệ rhơn rnôk ndơn saơ, bol ma nau mâp hôm geh jêr jŏt, cán bộ, tahen Biên phòng Cà Mau lah nsum, Đồn biên phòng Rạch Gốc lah êng, mro mât nâp tâm mpeh bôk năp, tâm rnglăp, tâm ban, ntrŭnh ƀư ân tam ăp nau kan njrăng rdâng, mât nâp ăp nau kan bah Biên phòng, mât ueh nau dơi ƀư tơm bah gôl dak, dak lêng bah n’gor. Kruanh Quốc hội Vương Đình Huệ lah rjăp, ngăn lah, tâm rơh tết năm mhe Nhâm Dần êp tât, cán bộ, tahen ăp rmôt kan bah tahen Biên phòng n’gor Cà Mau hŏ tâm grop nsum ngăn đah gưl uỷ, n’gâng kan, mât chăm tết ân ƀon lan ăp xã meng dak lêng, kơl an ăp rnăk geh n’hâm ma cách mạng, rnăk dơi kơl, rnăk ach o, kon se tâm nkuăl geh vơt năm mhe ueh lăng, duh răm, đăp mpăn.

Tâm bôk nau kan, Kruanh Quốc hội Vương Đình Huệ ndrel ăp nŭih tâm rmôt hăn kan bah Trung ương hŏ pă 750 nklâm ndơ pă ân Đồn biên phòng Rạch Gốc, ăp rmôt hăn leo lor njrăng srê, rnăk geh kơl an, ăch o, jêr jŏt tâm lam nkuăl Ngọc Hiển.

 Bah năp nê, Kruanh Quốc hội Vương Đình Huệ hŏ tât khâl, mbah rhơn Tết ăp cán bộ, tahen Tiểu đoàn U Minh 2 n'hanh ăp đoàn viên, nuĭh kan ta xã Phong Điền, nkuâl Trần Văn Thời, n'gor Cà Mau. Tiểu đoàn U Minh 2 lah tiểu đoàn cơ động hăn lơh bah n'gor, lah đơn vị n'gâng tơm tâm rlăch ndăng bah ƀon lan n'hanh tahen bah n'gor Cà Mau tâm rơh mprơh Mỹ  kơl neh dak, rlăch ndăng mât njrăng n'har bri Tây Nam n'hanh hăn pah kan dak bah dih kơl dak băl Campuchia. Lah ta Tiểu đoàn U Minh 2, Kruanh Quốc hội Vương Đình Huệ rhơn rnê ăp nău dơi ma đơn vị hŏ dơi geh, ŭch rŏng, ăp cán bộ, tahen dôl mât nâp han săk cách mạng, leo lor, ƀư lôch jêh ăp nău kan dơi Đảng, Ngih dak n'hanh ƀon lan nsing nơm ƀư./.

Nŭih rblang: H’Thi