VOV4.M’nông – Ta Jay Quốc hội Hungary, tâm rnôk khâl na nê̆ Hungary, Quốc hội Việt Nam n’hanh Quốc hội Hungary lĕ ƀư tâm nchră ndâk njêng pháp luật rơh tal 4 đah bôk nău “Lôch jêh rpăi pháp lý mpeh n’hŭch ndơ duh jay bil, ŭnh nar nkra njêng n’hanh wăng sa kloh uĕh”. Kruanh Quốc hội Vương Đình Huệ n’hanh Kruanh Quốc hội Hungary Laszló Kever ndrel ƀư rƀŭn nchră.

Kruanh Quốc hội Vương Đình Huệ râng Rgum nchră ndâk njêng pháp luật

Ta rgum nchră, ăp nuĭh ntoh măt Quốc hội, nuĭh way kan 2 dak lĕ tâm rgâl rah rơch mpeh ăp nău n’gluh an, ăp nău ntŭl rlong an mkra tâm nău lôch jêh rpăi pháp lý mpeh ndơ khih ƀư duh jay bil n’hanh ŭnh nar nkra njêng, nău kơl mpeh hun hao nâp nâl, trôk nar n’hanh rpăi pháp lý mpeh wăng sa uĕh kloh. Ntoh ngơi ta nar rgum nchră, Kruanh Quốc hội mĭn lah, Việt Nam mbra ƀư ngăch, têh dăng n’hanh lĕ rngôch, uănh khlay rgâl ŭnh nar kloh uĕh, ŭnh nar nkra njêng n’hanh hun hao ngih wâl tâm di đah rgâl trôk nar; uănh aơ lah gay dơi an ntrôl ntrong kan hun hao tĭng trong kloh uĕh, tâm rgâl, cacbon đêt n’hanh nâp nâl.

Nuĭh rblang: Y Sưng Phê Ja