VOV4.M’nông – Tâm trôm rơh hăn khâl na nê̆ dak Cộng hòa Dân chủ Nhân dân Lào, ôi 17/5 ta thủ đô Viêng-chăn, Kruanh Quốc hội Vương Đình Huệ lĕ rgum ôp đah Thủ tướng Chính phủ Lào Phankham Viphavanh. Ta rơh mâp, 2 nuĭh kruanh nkoch tâm di nău ŭch mpeh hun hao bah tâm boh kan ndrel đah 2 dak năm bah năp, uănh lah prêh nău 2 ding nsrôih mât tâm rgâl mpôl kan n’hanh tâm mâp gưl prêh ƀa ƀơ.

Kruanh Quốc hội Vương Đình Huệ mĭn lah Quốc hội Việt Nam uănh khlay trong kan ndâk njêng n’hanh jêh trong ƀư, pháp luật gay tâm di nău ŭch bah nău kan rgâl mhe n’hanh rgum lăp lam ntŭr neh, kơl n’hanh nsrôih groi nđôi, ntrôl nău ƀư tĭng ăp bôk nău kan, nău nchrăp ƀư kan ndrel đah 2 chính phủ Việt Nam n’hanh Lào. Mpeh trong n’hao kan ndrel ăp ding tâm năm tât, 2 kruanh rđău kan lah rjăp nău 2 ding an tâm rgop ƀư rjăp ăp tâm ton gưl prêh. 2 ding tâm ban ŭch nsrôih tay joi ăp trong rgâl mhe gay n’hao prêh kan ndrel wăng sa du trong n’gâng tơm ngăn ngên tâm boh 2 dak, tâm di đah nău tâm boh khlay Việt-Lào.

Nuĭh rblang: Y Sưng Phê Ja