Kruanh Quốc hội Vương Đình Huệ an gĭt, Quốc hội Việt Nam n’hanh êng Kruanh Quốc hội uănh lah prêh tâm boh dăch dêh n’hanh kan ndrel đah 2 dak, n’ăp ta trong chính phủ n’hanh nghị viện. 2 ding lĕ ký âk sam ƀŭt tâm ton kan ndrel, lơn lah nău ndâk njêng tâm rnôk kan ndrel jru hvi mpeh prăk kaih; lah uĕh Luxembourg lĕ n’hanh dôl an tay Việt Nam nău kơl-ngăn lah tâm nău n’hŭch ach o n’hanh njrăng n’gang rgâl trôk nar, Luxembourg lah ngoăy tâm âk dak ơm uănh an Hiệp định mât njrăng ntuh kơl Việt Nam-Eu (EVIPA). Thủ tướng Luxembourg an gĭt, nar 5-5, 2 ding ƀư rƀŭn wăng sa đah tât râng bah 25 doanh nghiệp Luxmebourg.

Nkoch naư uĕh mpeh nău kơl wăng sa bah Việt Nam tâm rnôk lam ntŭr neh dôl geh roh hŭch, Thủ tướng Luxembourg an lah, Việt Nam mô knŭng uănh khlay hun hao wăng sa, ma hôm uănh khlay n’hŭch duh play neh. Di rơh aơ, Thủ tướng Luxembourg mpŏng, Việt Nam ơm ntlơi visa đah nuĭh ƀon lan Luxembourg gay nta nơih an nău ntrôl kan ndrel wăng sa, tăch rgâl n’hanh tâm nđŭr nuĭh ƀon lan. Ta rơh rgum ôp, 2 kruanh tâm ban ŭch mpeh nău ntrôl dăng lơn tay tâm nău kan prăk kaih; mpŏng ndrel ntop kơl du jâng wăng sa uĕh, prăk kaih uĕh.