Ta rơh tâm nchră kruanh QH lah na nê̆ , Việt Nam way uănh khlăy nău tâm boh tâm rnglăp tâm kơl đah Uruguay, lah ueh nău tâm rnglăp n’hanh nău kơl an bâh ƀon lan Uruguay an ƀon lan Việt Nam ta rơh an geh nău đăp mpăn mpôl rnoi n’hanh rklaih đăp mpăn neh dak ntơm nơh, tâm ban kơt ta rơh hun hao neh dak aƀaơ.

Bar hê nuĭh leo kan mpơl nău rhơn rnôk nău tâm boh kan Việt Nam- Uruguay geh hun hao tay ueh, ăp nău kan tâm kơl geh mât săk rnglăy, bar ding an geh tâm rgop tay na nê̆ ta ăp rơh tâm mâp lam ntur neh n’hanh ntŭk kan âk ding khlăy lam ntur neh, ngăn lah ta LHQ, ntŭk kan tăch rgâl lam ntur neh, rơh tâm mâp tâm kơl Đông Á- Mỹ Latinh, ngăn lah ndrel geh mât ăp nău way kan n’hanh nău khlăy bâh chủ nghĩa đak ding tâm rnôk lam ntur neh geh âk nău tât jêr, jêr njrăng n’hanh nău tât bâh nuh srê Covid-19.