Kruanh Quốc hội Vương Đình Huệ lah na nê̆, Việt Nam ŭch 2 ding ntrôl tăch rgâl nâp nâl, tâm ban, nta nău dơh nơih rvăt nglăp âk ntil ndơ tuch tăm bâh Việt Nam tât Australia n’hanh rlơ̆ tay.

Kruanh Quốc hội dăn đă nuĭh mât nău kan lĕ rngôch Australia mât kơl, ntrôl nău tâm kơl ta trong pah kan, ngăn lah pơk hvi tâm kơl mpeh kĩ thuật tuch tăm n’hanh pah kan ta rơh rlu, ntrôl nău tâm boh kan đah ăp ntŭk bâh 2 dak. Kruanh Quốc hội Vương Đình Huệ lah ueh Australia kơl an Việt Nam săch lăp kan ta Hội đồng Nhân quyền LHQ năm kan 2023-2025, ndrel tâm nkoch mpeh âk nău mĭn tâm ban ta lĕ rngôch ăp rơh tâm mâp ta nkual n’hanh lam ntur neh. Nuĭh mât nău kan David Hurley tâm ban ŭch đah nău mbơh bâh kruanh Quốc hội mpeh du đê̆ trong kan tâm kơl mhe đah ntŭk kan lập pháp 2 dak, an lah, aơ lah trong kan dŭt khlăy, nsĭt tay nău geh an lĕ 2 ding, yor nĕ, an geh mât uănh tât trong kan aơ, kơt nti nău tă kan tâm bâh ntơm n’hanh sŏk neh ƀư nău nsing nơm nâp nâl gay ma n’hao nău tâm boh kan bar ding tâm let năp tay.